En que programa colaboras?

Colaboro nun programa de educación para adultos maiores. O programa está orientado a que persoas maiores que tiveron que deixar os estudos a unha idade temperá poidan mellorar os seus coñecementos de lectura, escritura, lingua, matemáticas etc. Unha vez por semana realizamos actividades de lectura en voz alta, lectura comprensiva, ditado, actividades de vocabulario, ortografía e matemáticas. O obxectivo non é só que aprendan senón tamén realizar actividades relacionadas coa atención e a memoria.

Por que te fixeches voluntaria?

Fíxenme voluntaria porque me gusta ensinar e pensei que debería dedicar parte do meu tempo libre a outras persoas.

Participaches o participas en accións similares?

Non realizo outras actividades, pero participo en actividades de educación de adultos desde hai doce anos

Que che achega a túa actividade como voluntaria nas Bibliotecas Municipais?

Participar nesta actividade resúltame moi gratificante. Como profesora, estar cun grupo de persoas que valoran aprender e que teñen interese en adquirir novos coñecementos é moi bonito. Para min é un intre de relax, ademais de traballar charlamos, e rímonos moito. Realmente dás moi pouco e recibes moitísimo. Pode parecer un tópico, pero só se entende se participas nestas actividades.