En que programa colaboras?

Alfabetización de persoas adultas, nivel alto

Por que te fixeches voluntaria?

Sobre todo, fíxeno por min mesma. Cando me xubilei sentín que tiña que facer algo relacionado coa miña profesión e así por unha banda servíalles de axuda ás demais persoas e doutra banda sentíame realizada.

Participaches ou participas en accións similares?

Sempre me gustou axudarlle á xente, pero é certo que cando estás en activo e con nenos pequenos é moi difícil, por iso no momento no que tiven máis tempo aproveitei para colaborar en varios ámbitos. En ocasións axúdolles a persoas estranxeiras nos seus trámites ou a persoas maiores simplemente escoitándoas e colaboro co Centro Cívico Novoboandanza dándolles clases de apoio a nenas e nenos de primaria.

Que che achega a túa actividade como voluntaria nas Bibliotecas Municipais?

O voluntariado enriquece as persoas, pero penso que é algo que só experimenta quen o realiza. Persoalmente síntome contenta de poder axudar, pero ao mesmo tempo as nenas e nenos e as alumnas maiores tamén me dan moito a min. Facer voluntariado é un traballo, e como todos os traballos uns días tes ganas e outros menos, pero sempre compensa.