A alcaldesa da Coruña, Inés Rey, acudiu esta mañá a pista de fútbol Cruyff Court, no barrio de Novo Mesoiro, para supervisar os traballos levados a cabo polo Concello para renovar de forma íntegra o céspede artificial. A rexedora estivo acompañada polo concelleiro de Deportes, Manuel Vázquez.

Esta instalación abriuse ao uso e gozo da cidadanía hai máis de dez anos, na contorna do pavillón polideportivo municipal situado na rúa dos Ancares. Cofinanciouse no seu momento polo Concello e a Fundación Johan Cruyff, impulsores dun proxecto que, desde os seus inicios, tamén abriu camiño á posta en marcha de competicións de fútbol base e campionatos en modalidades como o fútbol 6x6, por exemplo.

"Esta é unha instalación cun uso diario intensivo e este Goberno municipal quixo que os seus usuarios e usuarias poidan gozar dela en óptimas condicións", indicou Inés Rey. Esta actuación dálle continuidade ao plan de renovación das infraestruturas deportivas da Coruña coa substitución do tapete de herba artificial da Cruyff Court, unha instalación inspirada nos primeiros campos construídos pola Fundación Johan Cruyff no ano 2003, nos Países Baixos, e que foi a primeira infraestruturas destas características que o exxogador proxectou fóra de Cataluña.

As dimensións do campo de xogo son de 42x28 metros, superficie de herba artificial que foi substituída ante a erosión experimentada co paso do tempo, polo uso habitual da instalación, de acceso libre e empregada por centos de rapaces e rapazas do barrio de Novo Mesoiro. "Seguiremos a avanzar na modernización das nosas infraestruturas deportivas, apostando pola práctica do deporte ao aire libre entre persoas de todas as idades e polas instalacións municipais dos nosos barrios, que dan apoio ao desenvolvemento de hábitos de vida saudables", indicou Inés Rey.

Iluminación da pista de patinaxe de Novo Mesoiro

Inés Rey tamén confirmou durante a visita ás instalacións deportivas de Novo Mesoiro que o Concello iniciará nas vindeiras semanas unha serie de actuacións para mellorar a iluminación pública da pista de patinaxe do barrio, localizada na rúa dos Ancares e próxima ao pavillón polideportivo municipal e á pista Cruyff Court.

A pista, cuxa instalación no barrio decidiu o Goberno de Inés Rey e habilitada en decembro de 2022, ten 2.600 metros cadrados de superficie. Cunha lonxitude de corda interior de 125 metros e unha estaxe de cinco metros de ancho, a instalación conta coas medidas precisas para ser apta de cara á programación de probas e competicións deportivas oficiais.

Neste sentido, está previsto instalar máis báculos de iluminación na contorna da pista, coa finalidade de reforzar a visibilidade e seguridade das persoas usuarias. Desta forma, o Goberno municipal dará resposta a unha solicitude da veciñanza de Novo Mesoiro.