Poderaste atopar coa esencia creativa de Castelao, Braque, Díaz Pardo, Blanchard, Dalí, Seoane... e máis artistas que seguen representando hoxe a innovación artística.

Esta selección de obras mestras dará a oportunidade de coñecer parte deste valioso patrimonio artístico a todo o público que a visite. Con esta mostra queremos contribuír ao desenvolvemento cultural de Galicia e a salientar a vocación de difusión e divulgación da Colección de Arte ABANCA.

Nela inclúese case un cento de obras mestras na que destacan artistas clave na historia da arte universal, como Dalí, George Braque, Joan Miró, F. Leger ou Julio González, entre outros. Xunto a eles, tamén as figuras máis relevantes da arte galega dende comezos do século XX ata a actualidade: Castelao, Souto, Seoane, Díaz Pardo, Leiro, Manuel Vilariño ou Vari Caramés.

Neste colectivo ocupan un lugar destacado as catro Recolectoras de Francisco Leiro, concibidas polo escultor de Cambados como unha homenaxe a todas aquelas persoas que traballaron para recuperar a costa galega tras o afundimento do Prestige.