Os creadores de “A nena e o grilo” e “María Fumaça” producen esta nova proposta musical na que estarán acompañados do acordeonista Santi Cribeiro, para interpretar un repertorio composto por cancións da súa nova produción Canta o Cuco.

Esta proposta musical está composta por cancións de Canta o Cuco, libro que presentará Galaxia no mes de decembro no que homenaxean ao autor das Letras Galegas 2016, Manuel María, e cuxo título fai alusión ao canto do paxaro como símbolo de confianza no futuro e vínculo de compromiso e espertar da enerxía da natureza e a terra: “O ciclo da natureza que se reencontra consigo  mesma, a música das esferas”.

“Todo me fala de ti” inclúe unha  globalidade de ritmos e estilos musicais para vestir os versos de Manuel María que abrangue desde a música tradicional propia até os universos próximos do pop e o rock, pasando polos aromas da canción de autor ou os aires latinoamericanos do tango e do son cubano.

“Todo me fala de ti” é unha actividade pertencente ao programa de dinamización lingüística “FalaRedes”, promovido pola Consellería de Cultura e Educación –por medio da Secretaría Xeral de Política Lingüística –en concellos da Rede de Dinamización Lingüística (RDL) da Xunta de Galicia.