A exposición é a selección de 30 fotografías que o seu autor David Mateo Martínez realizou ao longo destes últimos anos, e reflicte o rexurdir da moto clásica na actualidade e a paixón que este mundo esperta en contornas moi diversas. Para iso documentáronse todo tipo de situacións, desde carreiras en Galicia até reunións cafe racer en Francia, pasando polas concentracións deste tipo de vehículos que podemos ver en practicamente calquera cidade. 

Para conseguir unha composición acorde co que se tenta transmitir nas fotos, buscouse unha técnica que ben nos pode facer rememorar unha época clásica, usando o branco e negro ou retratando situacións propias de hai anos, como pode ser arrincando unha moto a patada ou ambientacións retro con motos feitas de maneira artesanal polos seus donos.

A exposición poderase visitar do 5 ao 29 de setembro na sala Plataforma14 do Fórum Metropolitano da Coruña.

A sala Plataforma14, pertencente a Concellaría de Participación e Innovación Democrática e coordinada polo Centro Municipal de Información Xuvenil, pretende visibilizar a creación realizada polos/as artistas emerxentes da nosa cidade. Toda a información sobre este espazo pode atoparse na web www.coruna.es/cmix/plataforma14.