A Deputación da Coruña convoca todos os anos o Programa de subvencións para a limpeza de praias marítimas nos municipios da provincia da Coruña.

Este ano a finalidade do programa é a concesión de axudas aos concellos da provincia da Coruña, en réxime de concorrencia competitiva, para o sostemento dos gastos de limpeza das praias marítimas do seu termo municipal entre o 1 de abril e o 31 de outubro de 2024.

En 2024 o Concello da Coruña concorreu a esta convocatoria para obter unha axuda que contribúa a sufragar o custo do traballo que desempeña a UTE A Coruña Limpeza nas praias de Orzán, Riazor, Matadoiro, San Amaro, As Lapas, Oza-Lazareto e O Portiño.

A limpeza de praias en tempada estival é unha tarefa esencial para permitir manter a funcionalidade múltiple duns areais que, durante o día, acollen bañistas e deportistas e polas noites a miles de cidadáns que gozan dos eventos culturais programados no calendario festivo. A iso engádese, en veráns como o pasado, a dificultade de facer fronte a incidencias como a recollida de exemplares de medusas que chegaron, inusualmente, á costa galega.

Para o 2024 a Deputación concedeu 24.957,83 €, na resolución do 22 de febreiro de 2024 (BOP núm. 39, do 23 de febreiro de 2024).