Patrocinada e organizada pola Fundación Murcia Futuro, a exposición reúne 100 carteis, 260 publicacións, 5 audiovisuais ademais de maquetas e esbozos orixinais, a través dos que o espectador poderá coñecer a evolución e a profundidade do traballo realizado por Corazón no últimos cincuenta anos. A comisaria da mostra, Ana Arambarri, creou un percorrido expositivo dividido en sete grandes bloques que ofrecen unha visión global do universo creativo de Alberto Corazón, tanto na súa vertente artística como nos campos do deseño gráfico e industrial: Arte e deseño, Compromiso e ética, O papel do deseño na Transición, A renovación da imaxe, A modernización da empresa, O deseño e a Academia e por último, O deseño e a arte, concibido este último especificamente para a exposición que acollerá a Fundación Luís Seoane ata finais do mes de febreiro de 2014.