Os de Chicago, disco a disco, concerto a concerto, foron crecendo e aumentando a paleta das súas influencias. Revelation Sunday e Grace & Melody reflectían unha banda madura, en estado de graza, que abría os brazos ao hard, aos sons do rock clásico e mesmo á psicodelia e á chispeante alegría de harmonías vocais máis melódicas, sen deixar atrás o seu contundente muro guitarreiro marca da casa. 

Tras Live At The Double Door, onde quedaba rexistrada a súa tremenda solvencia en directo, chega o seu último lanzamento de estudio, Clava, que segue a senda marcada polos anteriores e ofrece outra boa colección de cancións que oscilan entre o poderoso son de «Remember The Taker», «Out On Love» ou «Vanishing Girl», o sabor a area rock que desprenden os retrousos de «Come On Down» e «Love Never Ends», os ambiente sesenta de «Bury My Burden Deep» e a melodía que guía «Meet Me In The Aftermath» con certo deixe a Neil Young e os seus Crazy Horse.

No 2012 incorporan un novo guitarrista á banda, Eric Saylors co cal rexistran ‘Live & Humble (2013). A xira de presentación da súa última obra, tremendo directo que nos deixa perplexos ante o poder á guitarra de Jeff Massey, traeranos de volta aos de Chicago nunha das xiras máis esperadas do ano.