O origami é unha arte xaponesa que consiste en dobrar un papel rectangular ou cadrado para obter figuras sen utilizar pegamento nin recortar. Toda unha arte, quizais sexa por iso que o origami está considerado como unha afección terapéutica, un hobbie moi educativo, que aumenta o poder de concentración, desenvolve a paciencia, a destreza manual e posibilita o equilibrio entre a percepción e a realidade. O nome desta arte provén da palabra xaponesa "Ori" que significa dobrez e da palabra "Kami" que significa papel. Pensamos que é orixinaria de Xapón, en realidade, non se orixinou en Xapón senón en China arredor do século primeiro ou segundo e non foi senón ata o século sexto que chegou a Xapón levada aí polos monxes. O papel non era tan sinxelo de conseguir, o papel feito á man era accesible só á clase rica e privilexiada e por suposto á clase relixiosa polo que nun principio o origami utilizábase unicamente con fins relixiosos, e en importantes cerimonias. Pouco a pouco as diferentes técnicas de fabricación de papel lograron que o origami se fose internando nas clases menos afortunadas pero igual de creativas e hábiles na formación de figuras. Ras, estrelas, garzas, peixes, flores, barcos, avións e animais de todo tipo, así como figuras xeométricas de cores veñen á nosa mente en canto escoitamos a palabra origami.

Contido do taller: Nivel básico, o alumnado aprenderá paso a paso as pregaduras e as formas básicas que lle permitirán coñecer e gozar do mundo do "origami", realizando caixiñas, animais, flores, pezas modulares e xeométricas. Aprender a "ler" e interpretar diagramas, para logo facer moitas das innumerables formas que existen, inclusive, de maior dificultade, figuras que se realizan para ser utilizadas como adorno, obsequio, souvenir, ou simple pasatempo. O origami desenvolve a creatividade, a capacidade de concentración e exercita a habilidade coas mans.

Materiais: O papel é en realidade o único material necesario, paquetes pre-cortados de diferentes tamaños do papel "kami" (papel en Xaponés), creado especialmente para origami, é un pouco máis lixeiro que o papel de copia e préstase para unha gran variedade de pregaduras, diferentes deseños e cores por un ou ambos os lados do papel.

Imparten os talleres: Chikako Miyajima e Taeko Hoshikawa da Casa Galicia Xapón.