Naceu en Stuttgart, Alemaña, en 1970, e desenvolve actualmente o seu traballo en Berlín. Instálase en París aos 19 anos, onde se matricula en Estudos franco-xermánicos na Universidade Sorbonne-Nouvelle. Alí traballa como tradutor e profesor de idiomas. Trasládase ao Reino Unido para estudar Belas Artes na Central School of Speech & Drama de Londres e na Norwich School of Art & Design. Posteriormente establece o seu estudio en París, onde continúa recibindo clases de debuxo. Durante os anos seguintes traballa como produtor radiofónico, locutor e extra de cinema. Ensina alemán na Escola do Louvre e no Instituto Louis-lle-Grand. Asina un contrato como director artístico e asistente de dirección de Joel Cano para a película cubana "Siete días, siete noches".

Recibe varios premios e viaxa por traballo a Cuba, Irlanda (Cork, Sculpture Factory), Austria (Graz, European Forum for Emerging Creation), Alemaña (Weimar, ACC European StudioProgramme) e India (New-Delhi/Kolkata, Artists-in-Residence, Embaixada de Francia). Realiza exposicións individuais e colectivas nestes países, así como intervencións no espazo público e escribe textos teóricos e de ficción. Instálase en Marsella, para, despois, trasladarse a Berlín. Traballará en Nova York e Quebec durante os anos 2008 e 2009 (Centre d'artistes Vaste et Vague, Carleton). Foi o primeiro bolseiro internacional do MAC Gas Natural Fenosa no 2012. Considera o seu traballo como arte conceptual sensual: “A arte é o que fai a vida máis interesante cá arte”.