Despois de que, durante a programación especial da Semana do Libro do ano pasado tivesen que suspender a función a causa do accidente que o actor Evaristo Calvo sufriu durante a representación de Oeste Solitario, volven Mofa e Befa con Shakespeare para Ignorantes (programación especial Día Internacional do Libro).

IGNORANCIA.- Falta de ciencia ou de noticias sobre un asunto particular ou xeral.
SHAKESPEARE.- Creador e produtor teatral de gran suceso no século XVII.

O aspecto inicial do espectáculo é o do produto didáctico en estado puro, recalcando a condición de colectivo do público, carente duns coñecementos concretos. Dende esta transparencia expositiva, o primeiro que se desenvolverá en escena será a conferencia dun prestixioso profesor. Presumidamente, a conferencia pretende ser unha amena palestra para un público con coñecementos menos que básicos da inmortal obra do conspicuo bardo. O profesor reclamará, para facer máis deleitosa a instrución que pretende inocular nas molleras dos circunstantes, o concurso de dous actores talentosísimos, pero temporalmente desempregados. Estes son MOFA&BEFA.