O certame contará con diferentes espazos no centro da cidade para albergar proxeccións, instalacións, exposicións e performances, talleres infantís e encontros cos cineastas invitados. A sede principal volve ser, coma no 2013, o edificio do Centro Sociocultural Fundación Novacaixagalicia, mentres que no Teatro Rosalía de Castro a Mostra dará o pistoletazo de saída na tarde do mércores 4 de xuño. O patio da Fundación Luis Seoane será o lugar de encontro para as noites de performance de cinema expandido, un dos sinais de identidade do (S8). O CGAI, colaborador do festival dende os seus inicios, albergará diversos programas deste Especial Xapón. Por outra banda, o Kiosco Alfonso convértese en punto de encontro co público infantil e sede do Mini (S8), unha das seccións máis participativas dentro da programación do festival.

 

ANO DUAL ESPAÑA – XAPÓN 2014

Para a súa quinta edición, o (S8) conta coa participación de Xapón como país invitado, unha das cinematografías máis suxestivas e importantes da historia do cinema. Esta Edición Especial formará parte das actividades que se están desenvolvendo no noso país durante o 2014, dentro do Ano Dual España-Xapón. Isto converterá, durante as datas do festival á cidade da Coruña, en foco principal deste evento internacional que conmemora os 400 anos de relacións entre ambos os países.

Nesta Edición Especial Xapón o (S8) abordará o pasado, presente e futuro da cultura cinematográfica xaponesa, desenvolvendo un amplo programa que vai dende as súas orixes aos nosos días, facendo especial fincapé nas vangardas, as novas expresións e os novos cineastas xaponeses que estarán presentes durante a Mostra.