- Sábado 11 de xullo

PINTURA RUPESTRE

Neste taller, os nenos coñecerán as técnicas, os diferentes motivos decorativos e a elaboración dos pigmentos naturais empregados polos homes e mulleres da Prehistoria para decorar as paredes das súas covas. Nunha primeira parte mostraránselles exemplos reais de pinturas, ademais de materias prehistóricas orixinais expostas nas vitrinas do museo, despois crearán as súas propias pinturas rupestres, utilizando pintura de mans.

- Sábado 18 de xullo

CERÁMICA CASTREXA

Con esta actividade, achegaremos aos asistentes aos labores artesáns de fabricación de obxectos cerámicos dos nosos antepasados castrexos. Despois dun percorrido polas salas de arqueoloxía, os participantes elaborarán coas súas mans un obxecto de barro, inspirándose en formas e decoracións de pezas orixinais feitas polos homes e mulleres que habitaron os castros.

- Sábado 1 de agosto

MOSAICO ROMANO

Despois dunha breve explicación sobre a técnica musivaria e despois de ver varios exemplos no museo, os asistentes elaborarán un mosaico empregando os patróns que se lles proporcionarán.

- Sábado 8 de agosto

SOLDADOS ROMANOS

Nunha primeira parte visitaranse, nas salas do museo, as vitrinas dedicadas aos campamentos romanos, a continuación converteranse en soldados imperiais, construíndo o seu propio casco, espada e escudo defensivo á maneira romana, para elo utilizarán como base cartón e cartolinas, que recortarán e pintarán.

- Sábado 22 de agosto

SELO DE OLEIRO: TERRA SIGILLATA.

Os nenos entrarán en contacto coa cerámica romana coñecida como “terra sigillata”. Coñecerán, a través das pezas expostas nas vitrinas do museo, as funcións, formas, decoracións e características particulares desta cerámica romana fina. A continuación farán o seu propio selo de oleiro tallando con gubias sobre gomas de borrar. Farán probas sobre plastilina ou barro sobre o papel.