Un disco gravado grazas a un proxecto de crowdfunding no que se arroupa dun nutrido grupo de artistas para crear un traballo que chega ao Teatro Colón como punto de partida do seu lanzamento.

Se hai algo característico de Nelson Quinteiro á hora de empregar a súa voz é o uso de pedais de loop, delay ou ecualizadores sobre os que arma polifonías, xogos vocais ou dende os que dispara bases de percusión sampleadas, escenas sonoras ou outro tipo de recursos tecnolóxicos que converten as melodías tradicionais galegas e as músicas do mundo en algo completamente vixente e actual.

Acompañado de artistas como Álex Lorenzo (guitarras), Fran Castro (teclado, baixo), Pulpiño Viascón (serrucho máxico, zandrum, percusións), Eduardo Méndez “Dubi” (saxo tenor e sorprano, frauta traveseira), Silvia Penide, Xandre Outeiro (Projecto Trèpia), María López (Faltriqueira) ou un coro de homes de agrupacións como “Os Estalotes” ou a coral “Cantigas e Agarimos” de Santiago de Compostela levou adiante un disco moi interesante rico en matices e que presenta no Teatro Colón nun espectáculo no que a bagaxe escénica de Quinteiro aflora para conformar unha montaxe que vai moito máis alá da esfera musical.