La Dolorosa Compañía é un dúo cómico-musical formado por
• Lúa Gándara (Fernanda Jiménez; voz): cantante e artista multidisciplinar que provén do free jazz e a improvisación libre, así como da performance. Neste espectáculo mostra o seu lado máis acedo, cómico e visceral. Unha voz impresionante combinada cunha actitude arrasadora que non deixa a ninguén indiferente.
• Rodrigo Cuevas (Jimeno Fernández; voz, acordeón e teclado): cantante e único sex-symbol da copla en activo; con formación clásica en piano, gran coñecedor da música tradicional ibérica e do cuplé. Unha voz redonda e potente que unida ao seu manexo do escenario engancha o público dende o primeiro momento.
Xuntos compleméntanse neste dúo artístico no que a emoción e a comedia se combinan coa exploración das delgadas liñas que separan a virtude e a decadencia, o marabilloso e o cutre. Ao abarcar tanto espectro temporal e cultural desta maneira tan desenfadada e interactiva, fanse adecuados para calquera tipo de público e ocasión.

Este espectáculo consta de 2 partes ben diferenciadas:
• COPLA PUNK (en canto a actitude): Fernanda e Jimeno rescatan as cancións máis sufridas do panorama coplero e cupletista español, influenciados por pinceladas de música mexicana, fados… todo aquilo que nos fale de sufrir dende un punto de vista irónico, unha traxicomedia.

• VERBENA PSICODÉLICA: na segunda parte, Fernanda e Jimeno sofren un strep-tease en directo transportándose a calquera época que lles apeteza e provistos dun teclado Casio ao máis puro estilo “rom”, deixando así pampo ao máis viaxado cunha combinación chea de sensualidade, poesía, decadencia, pasodobre, tecno-transo e danza oriental.