Hai xa 130 anos que Pontevedra viu nacer o primeiro Coro Galego. Aos poucos, ducias de vilas galegas fóronse sumando a esta proposta de reivindicación do noso patrimonio musical, grazas en gran medida ao impulso das Irmandades da Fala.

Nacían así Cántigas e Aturuxos en Lugo, A Artística en Vigo, Os Enxebres en Ourense, Viva o Ribeiro! en Ribadavia, A Foliada en Noia, Airiños do Ulla na Estrada, A Troula en Sada... e tamén, os catro coros históricos que chegan aos nosos días.

Nove anos despois da primeira edición, seguimos celebrando o xerme de emoción pola Terra con tres domingos moi especiais e ao longo de tres concertos: o 20 de outubro, o 10 e 24 de novembro.

No primeiro concerto, a Coral de Ruada ofrece unha selección de melodías do seu rico arquivo musical. Cantos á beira do Miño e composicións que lembran a riqueza da terra ourensá. Ademais, Cántigas da Terra quere homenaxear a dous gaiteiros, Antonio Mato e Edmundo Vilariño, que viviron mil e unhas aventuras nas máis de dúas décadas que estiveron na entidade. Memoria viva para orgullo de todos nós.