Durante séculos as estrelas e certas marcas naturais visibles na costa serviron como únicas axudas aos navegantes. Coa construción dos primeiros faros, xa dende a Antigüidade arrincaron os intentos por establecer sistemas de sinais luminosos, visuais e acústicos, ata desembocar nas máis modernas radioeléctricas e dixitais.

Os faros son a evidencia máis recoñecible dunhas axudas á navegación tan imprescindibles como inseparables da paisaxe costeira. Esta exposición pon en contexto pezas técnicas e históricas propiedade de Portos do Estado, convertidas hoxe, xunto aos homes e mulleres que as accionaban e controlaban, nunha singular faceta do noso patrimonio cultural.