Xurxo Lobato ofrece na exposición a súa particular visión da transformación que dende hai anos vive a súa Galicia natal, dacabalo entre a tradición e a modernidade. Deste xeito, a realidade preséntase como un renxeante colaxe que capta a mestizaxe entre o rural e o urbano.

Doutra banda, o uso abundante do grande angular permítelle ao fotógrafo ofrecer eses contrastes cunha amplitude narrativa tal que termina por suxerir unha lectura cinematográfica das súas imaxes.  

O pintor Antón Patiño afirma no prólogo do libro, do que se extraeron as imaxes para esta exposición, que as súas fotografías lembran o realismo subxectivo de Fellini así como o expresionismo atlántico contemporáneo, referentes no que se pode encadrar esteticamente a súa achega.

SOBRE O FOTÓGRAFO

Xurxo Lobato (A Coruña, 1956). Licenciado en Historia. Académico de Real Academia Galega de Belas Artes. Colaborador de El País, Mundiario, Getty Images. Coordina o premio Ksado da Deputación da Coruña e dirixiu cursos na UIMP e na Universidade de Santiago de Compostela.

Premio da Crítica do Día das Letras Galegas, e Premio Ortega y Gasset de El País, participou en máis de 40 libros con autores como Torrente Ballester, César Antonio Molina, Suso de Toro, Luis Carandell ou Manuel Rivas. Parte da súa obra figura en coleccións públicas como o Museo Reina Sofía, MARCO de Vigo, IVAM de Valencia, MAC da Coruña, Colección de Arte Contemporánea ‘Xéneros e tendencias nos albores do século XXI' de Alcobendas ou a Colección Coca Cola, entre outras. O seu traballo foi exposto nun gran número de exposicións individuais e colectivas, entre as que destacan ‘A paisaxe intervida', no Círculo de Belas Artes, ‘Negra sombra' en PHotoEspaña ou ‘Catro direccións: Fotografía Española Contemporánea' no Museo Reina Sofía.