Dentro do ciclo de conferencias sobre ópera no Centro Sociocultural Novacaixagalicia da Coruña para reflexionar e debater as cuestións que o xénero nos presenta na actualidade: por que xa non existen cantantes coma os de épocas anteriores?, cal é o labor dun director de escena e por que exercen tanta influencia na ópera?, son Verdi e Wagner incompatibles?, como se prepara unha temporada lírica?, está morta a ópera? Estas preguntas serán abordadas en distintas sesións dende un punto de vista crítico e sempre con exemplos musicais recollidos en testemuños audiovisuais dos principais teatros do mundo.

Coñece a arte lírica a fondo todos os mércores de novembro e os dous primeiros do mes de decembro en Novacaixagalicia.

Nesta ocasión  a conferencia titúlase "Dous colosos no seu bicentenario: Pódese amar a Verdi e a Wagner ao mesmo tempo?"

A presente temporada operística vén marcada pola dobre conmemoración do bicentenario de dous colosos do xénero: Giuseppe Verdi e Richard Wagner, a miúdo opostos na imaxinación dos defensores dun e outro compositor, como se fosen incompatibles. Nesta sorte de vidas “paralelas” propoñerase un achegamento ás características que os unen, e a posibilidade de gozar de ambos sen traizoalos.