É unha obra que imita, para mofarse, a forma da comedia burguesa de sofá e moble-bar. Todo acontece nunha luxosa casa de campo clónica inscrita nunha urbanización de alto nivel. Ao dono parece que lle vai ben na vida: é un alto funcionario do Estado, e recibe a visita da fin de semana do seu máis estreito colaborador, un arribista que vén para ensinar a súa nova esposa, un símbolo de status económico. A lista dos quiméricos inquilinos complétase co fillo dos propietarios, que é grande de máis para que lle cambien os cueiros, e unha au-pair sueca que non lle importa facelo.

Os paxaros cantan, o sol brilla e todo está tan limpo que se podería comer no chan do garaxe... ata que comezan os problemas: os W.C. entúpense e non hai a onde ir. Os dous funcionarios teñen que mudar o seu plan de relax da fin de semana por algo máis adstrinxente: son policías e o seu deber é saber de onde sae toda aquela porcallada. As sospeitas crúzanse, os ollos espían de perfil, os narices engúrranse con desagrado, as sombras deslízanse na noite... Todo baixo a enigmática mirada da Gioconda, que parece dicir: En todo este asunto hai algo que ole moi mal.

O espectáculo, de Producións Teatrais Excéntricas, S.L., dirixido por Quico Cadaval, está protagonizado por María Costas, Evaristo Calvo, María Garat, Víctor Mosqueira, Ana San Martín e Santi Romay.

Venda de entradas:

Despacho Central, Praza de Ourense: de luns a venres de 9.30 a 13 e de 16.30 a 19.30 h.

Despacho do Teatro Rosalía: só días de función, de 12 a 14 e de 18 a 20 h.

Venda telefónica: 902 504 500.