A Coruñesa iniciou a súa actividade expositiva a mediados da década dos 80 e dende entón realizou multitude de exposicións individuais e colectivas, principalmente en Galicia e publicou os seus debuxos en xornais (A Nosa Terra) e libros (Gran Enciclopedia Galega, Kitaro/Ti – Brais do Castro). Gañou diversos premios, entre os que destacan o 1º Premio de cerámica no Concurso Internacional Palacio de Módena (Italia). A súa obra pódese contemplar de forma permanente no Concello de Oleiros ou no Complexo Hospitalario Universitario A Coruña.

A obra de Chelo Facal caracterízase pola súa absoluta orixinalidade en canto ao tratamento de formas e cor, en perfecta simbiose co seu peculiar expresionismo. Os temas da pintura de Chelo Facal, camiñan dende un mundo idílico de vasos de flores, multitude de variantes sobre o tema do mar, peixes, paisaxes, sereas e belas mulleres de grandes ollos, ata imaxes extraídas dos seus propios pesadelos, nunha estraña viaxe que en ningún caso deixará indiferente o público e que consegue que a súa obra se revalorice día a día.