Elegancia, rigor, sobriedade e perfección técnica son algunhas das calidades asociadas de forma habitual á arquitectura suíza. Sen renunciar necesariamente a elas, é evidente que a complexidade e diversidade de situacións ás que se enfronta a arquitectura contemporánea demanda novas aproximacións, novas maneiras de avaliar a beleza e utilidade das formas.

Esta exposición itinerante pon en relación a arquitectura suíza con dous conceptos que van máis alá do obxecto construído e a súa posible perfección formal e técnica. Para iso reúne pezas procedentes de dúas mostras que chegan por primeira vez a España. Por unha banda, "Swiss Positions: 33 takes on sustainable approaches to building", presenta a través de excelentes fotografías unha visión complexa da cuestión do desenvolvemento sostible, afastada dos tópicos da arquitectura bioclimática, e, por outra, "The Swiss Touch in Landscape Arquitecture" que ofrece un percorrido pola tradición, a actualidade e o futuro da arquitectura da paisaxe no país helvético, campo de probas dalgunhas das máis interesantes investigación recentes.

Dúas visións complementarias, marcadas pola conciencia ecolóxica, que demostran unha vez máis a riqueza e capacidade de innovación da arquitectura suíza, fonte inesgotable de inspiración a nivel mundial.

Con esta exposición o Museo de Belas Artes da Coruña continúa a súa aposta por que manteñan na súa programación mostras dedicadas ás diversas tendencias da arquitectura, neste caso en colaboración coa Escola de Arquitectura da Coruña e a Embaixada de Suíza en España.