A compañía galega Espello Cóncavo trae 'Anxeliños' ao Colón, unha comedia que describe os avatares dunha sociedade familiar dedicada ao cobro de morosos, inmersa nunha crise económica. 'Anxeliños' está dirixida por Arturo López e interpretada por Fernando Morán, Rodrigo Roel, Estíbaliz Veiga, Manu Fernández e Isabel Martínez Risco.

SINOPSE: Charli, ex-policía franquista, dirixe unha axencia de cobro de morosos. Xunto con el, Leti, a súa filla; Chema, o xenro; Tigre, vello amigo, tan fiel como inútil e Sor Anxélica, unha monxa empeñada en salvar almas á forza. Charli e os seus serán capaces de calquera cousa para salvar a axencia, mesmo pactar co diabólico gánster Damián... A compañía Espello Cóncavo é unha compañía histórica no panorama teatral galego. Naceu en 1994 co fin de levar aos escenarios un teatro comprometido coa cultura do país galego, cos seus autores e a súa realidade. As principais montaxes que puxo en escena foron, entre outras: 'Vapores', 'Bailando en verán', 'As troyanas', 'Peter Pan', 'Tres no bambán', 'Castelao sempre', 'Zardigot'...