O Colectivo Femme Fatale nace despois dun curso casting realizado pola Consultora Cultural TIL DIACRÍTICO en Pontevedra en maio do 2014. Contando coa dirección escénica de Nelson Quinteiro, este colectivo, que agrupa a case unha ducia de artistas con residencia na área de influencia de Pontevedra-Vigo, presenta a súa primeira obra dentro desta nova andaina, co título "Babel. Canto de sereas", neste ronsel de linguaxes anteriores de Nelson Quinteiro como "Varadas" (2008) ou "As meniñas perdidas" (2011).

En "Babel. Canto de sereas" abórdase unha reconstrución do xénero creando unha historia na que a cidade é o que simboliza o cabaré. Inspirado na estética e linguaxe de Won Kar Wai, BABEL pivota arredor da creación literaria, as perversións sexuais e o suicidio como liñas dunha historia retrofuturista nunha cidade imaxinaria chamada Babel, onde non existen as convencións sociais e as cousas móstranse tal e como son.