Antonio Mourelos, presidente da Academia Galega do Audiovisual, será o anfitrión da actividade que pon o broche de ouro de CoruñaFilm 2013; un diálogo con Candela Peña aberto ao público no que se realizará un percorrido pola filmografía da recoñecida intérprete, os seus mellores momentos profesionais, anécdotas durante as súas máis de dúas décadas como actriz e reflexionarase sobre a profesión do actor na nosa industria. Candela Peña responderá as preguntas dos espectadores que poderán así participar na actividade formulando dúbidas e cuestións arredor da carreira da gañadora de tres premios Goya da Academia.

Candela Peña (Barcelona, 1973) formouse no mundo da escena no Centro Andaluz de Teatro en Sevilla e no estudo de Juan Carlos Corazza de Madrid. Comezou no cinema en 1994, cando foi seleccionada para intervir en Días contados, de Imanol Uribe, e pola que xa foi nomeada aos Goya á Mellor interpretación feminina de repartición e Mellor actriz revelación. Pero foi en 1999 cando se consagrou na gran pantalla grazas ao seu papel en Todo sobre mi madre, de Pedro Almodóvar. Nomeada aos Goya en cinco ocasións, conseguiuno en tres: no 2003 por Te doy mis ojos; no 2005 por Princesas e no 2012 por Una pistola en cada mano. Ademais, foi galardoada co Premio Ollo Crítico de RNE, o Fotogramas de Prata e o Premio Ondas. Entre máis das súas 20 películas destacan: Hola, ¿estás sola?, Boca a boca, Descongélate, Después de la lluvia, El patio de mi cárcel, En el lado de la vida, La isla interior, ou Ayer no termina nunca. Convencida por Pedro Almodóvar, no 2001 escribiu a novela Pérez Príncipe, María Dolores. Candela Peña dirixiu tamén a longametraxe 9, protagonizada por Aitor Merino, Elena Anaya e Pilar Castro.

Antonio Mourelos (Lugo, 1959). Os seus comezos no mundo da ficción audiovisual viñeron da man da serie “Rías Baixas” (TVG) e destacou polos seus traballos en “Cuéntame”, “El Comisario”, “Os Atlánticos”, "As Leis de Celavella" ou “Matalobos” –por estes últimos recibiu o Premio Mestre Mateo 2003 e 2011 á mellor interpretación masculina de repartición-, “Libro de familia”, “Imperium” ou “El secreto de Puente Viejo”, entre outras series. Este actor lucense, licenciado en Ciencias da Información (Imaxe e Son), iniciou a súa carreira na radio nos anos 80. Dende 1985 realizou un intenso labor de dobraxe e dirección de dobraxe converténdose nun dos máis recoñecidos profesionais do medio para televisión e cinema, sobre todo en galego. As voces de Michael Caine ou Jeremy Irons, na TVG, son, en realidade, a súa. Dende o 2000, a súa carreira como actor en televisión e cinema foi imparable. Os seus papeis en películas como El alquimista impaciente e Para que no me olvides, de Patricia Ferreira; Entre bateas, O ano da garrapata e 18 comidas, de Jorge Coira; Os luns ao sol, de Fernando León; O lapis do carpinteiro, de Antón Reixa; Secuestrados en Xeorxia, de Gustavo Balza; Pradolongo, de Ignacio Vilar; ou Los muertos van deprisa, de Ángel de la Cruz, avalan a súa traxectoria profesional. Profesor asociado na Facultade de Ciencias da Comunicación da USC, preside a Academia Galega do Audiovisual dende o 2011.