Dúas poetas establecidas en Galicia pero nadas fóra de aquí: nin máis nin menos que a última membro da Real Academia Galega -Marilar Aleixandre- recitará a carón da última Medalla de Ouro ás Belas Artes (en Literatura) e primeira muller en gañar o Premio Nacional de Poesía (en 2003), Julia Uceda. Xa o 27 de marzo, o lalinés Celso Fernández Sanmartín fará dúo coa poeta mexicana en lingua zapoteca Natalia Toledo, nun recital tinguido de oralidade, folclore e o sabio legado da tradición.

Julia Uceda naceu en 1925 en Sevilla e na mesma cidade se licenciou e doutorou en Filosofía e Letras. Traballou toda a vida como catedrática de ensino superior, inicialmente nas Universidades de Cádiz e Sevilla.

Mais de Andalucía trasladouse -en 1965- á Universidade de Michigan, onde exerceu ata 1973. A ese periplo americano seguiríanlle tres anos máis en Irlanda, para rematar por instalarse en Ferrolterra, onde leva xa catro décadas.

Escritora en galego, Marilar Aleixandre naceu en 1947 en Madrid.

Ademais de poeta é unha prolífica e célebre narradora, tamén tradutora, guionista de banda deseñada, activista no feminismo e na defensa dos dereitos sociais. Alén diso, traballa como catedrática de

Didáctica das Ciencias na Universidade de Santiago de Compostela, cidade na que reside. Hai menos dun mes, ingresou como membro da Real Academia Galega.