Borja Cobeaga (San Sebastián, 1977) tivo a súa vocación clara, e aos 9 anos comezou a rodar curtas no xardín da súa casa, xunto aos seus compañeiros de clase. Aos 24 xa era nomeado aos Goya pola súa curtametraxe La primera vez e, tras dirixir series como “Vaya semanita” (ETB) ou realizar programas como “Gran Hermano”, entre outros, no 2005 levou o seu talento alén do charco, onde optou aos Óscar na categoría de Mellor Curtametraxe por Éramos pocos (2005). É o guionista de La máquina de bailar e o seu debut como director de longametraxe de ficción (antes codirixira Limoncello) foi grazas a Pagafantas (2009), ópera prima pola que foi nomeado aos Premios Goya na sección de Mellor Director Novel. A súa segunda película clausuraría o Festival de Cinema de Xixón en 2010, No controles, Premio do Público no Festival de Cinema de Nantes. Actualmente prepara o seu terceiro filme, Fe de erratas.

Paula Ortiz (Zaragoza, 1979). Tras licenciarse en Filoloxía Hispánica na Universidade de Zaragoza, realizou un master en Guión na Universidade Autónoma de Barcelona e no 2010 doutorouse cunha tese sobre a escritura de guións cinematográficos. Non en balde a escritura parece marcar o seu camiño: “Vánseche ocorrendo historias cando les noticias, cando falas con xente ou cando les novelas”, afirma. Profesora na Universidade de San Jorge en Zaragoza, Paula Ortiz fundou a súa propia produtora, Amapola Films, xunto a Kike Moura, Raúl García e Jesús Bosqued, combinando o sabor artesán dos contadores de historias co uso innovador e vangardista das tecnoloxías dixitais. Dende Amapola dirixiu a súa ópera prima, galardoada na Seminci 2011 e nomeada aos Goya ao mellor director novel: De tu ventana a la mía, un filme protagonizado por Maribel Verdú, Leticia Dólera e Luisa Gavasa. Ortiz rodou 5 curtametraxes e actualmente prepara a súa segunda película, unha adaptación da obra de Lorca Bodas de sangre.