#Coruña42 desvelará este xoves día 19 un dos seus segredos mellor gardados: o seu percorrido. O Maratón Atlántica, que o próximo 19 de abril realizará a súa cuarta edición, presentará o seu trazado nun acto que terá lugar no auditorio do Centro Cívico dos Mallos ás 20.00 horas. O circuíto será presentado polo campión de España, Pedro Nimo, xunto a outro galego ilustre, Lolo Penas, que espera poñer a súa primeira marca en maratón en Coruña42.

Ao acto poderán asistir tanto patrocinadores como institucións colaboradoras co maratón, así como todas as persoas corredoras que o desexen. A capacidade será limitada e facilitaranse 275 invitacións que se poderán conseguir de forma gratuíta, do mesmo xeito que noutras ocasións, na web de Ticketea. Para iso accederase a través deste enlace

Ademais da presentación do percorrido, que será explicado e detallado por Pedro Nimo, farase público o vídeo oficial de #Coruña42 e daranse a coñecer as actividades paralelas que se desenvolverán. Así mesmo, falarase sobre o programa de AnimaciónCoruña42, formado por unha gran variedade de grupos musicais e masterclass deportivas que amenizarán no día da carreira a corredores e público.

Os días previos, 17 e 18 de abril, volverá abrirse ao público a Exporunning, unha feira do corredor que volverá ter a súa sede en Palexco e onde, ademais de recoller os seus dorsais e bolsa do corredor, as persoas participantes poderán descubrir as principais novidades sobre o running, material deportivo ou nutrición. Ademais, volverá realizarse un ciclo de conferencias sobre diferentes temas de interese relacionados co deporte, a psicoloxía ou a fisioterapia. Grazas á colaboración de Cambalache, os corredores poderán gozar da Pasta Party, con grande éxito de participación na pasada edición. No propio Palexco ofrecerase un buffet de pastas servidas nun marco incomparable coa baía coruñesa de fondo.

O sábado previo á proba haberá un Breakfast Run solidario e a continuación disputaranse as carreiras de menores. Sobre todas estas accións informaremos proximamente de forma máis pormenorizada sobre os prazos para inscribirse e a forma de gozar de todas estas actividades.

#Coruña42 ensinaralles o seu camiño aos seus corredores, que coñecerán así o trazado que os agarda o próximo 19 de abril. Porque correr é de valentes. Vémonos no Maratón Atlántica?