Sílvia Pérez Cruz fala a linguaxe da música desde que ten uso de razón, creceu entre cancións populares ibéricas e latinoamericanas, educouse no clásico e o jazz. Contaxiada polo flamenco a través dunha conexión que parece sobrenatural, canta dunha forma que só é súa e fai estremecer.

Sería imposible encadrar a Sílvia Pérez Cruz nun só estilo. É versátil e inconfundiblemente persoal. Dúas calidades que raramente coinciden e en cambio a ela defínena. É fiel aos diferentes estilos que aborda sen deixar de ser, en ningún momento, ela mesma.

Formou parte de infinidade de discos e proxectos. Co contrabaixista Javier Colina rescatou o filin cubano e formou dúo ocasional con Toti Soler. Debutou como compositora e solista con '11 de novembre' (Universal, 2012), que uniu éxito de público e crítica e polo que recibiu un disco de ouro. Este ano recibiu outro polo seu último traballo editado, 'Granada' (Universal, 2014), publicado a dúo con Raül Fernandez (Refree), con quen tamén coproduciu o anterior.

Recentemente participou na composición e gravación da banda sonora de 'Cerca de tu casa', de Eduard Cortés, unha película sobre os desafiuzamentos que ademais protagonizou e que está pendente de estrear. Tamén foi a voz da película 'Blancanieves' de Pablo Berger, gañadora de 10 goyas en 2013, entre eles, o de mellor canción orixinal.

VENDA DE LOCALIDADES

Despacho da Pza. Ourense: de luns a venres (excepto festivos) de 9.30 a 13.00 e de 16.30 a 19.30 h (Temporalmente situada no Teatro Rosalía no mesmo horario)

Despacho do Palacio da Ópera: día do concerto de 11.00 a 14.00 e de 17.00 h ata o inicio do concerto.

Venda telefónica: 902 044 226 (de luns a venres de 9.00 a 22.00 h; sábados de 14.00 a 22.00 h; domingos de 16.00 a 21.00 h)