A súa Galería Atlántica foi durante as súas dúas décadas de dedicación auténtica referencia, tanto para as grandes firmas ás que atraeu, como polo seu apoio aos artistas que xurdían e aos que potenciou.

O 22 de febreiro de 2012 falecía Salvador Corroto na Coruña, aos 64 anos de idade, deixando tras de si un inmenso labor cultural. Queremos que esta exposición sirva para mostrar o recoñecemento e gratitude dos coruñeses. A limitación de espazo fixo imposible reunir obra de todos os artistas que tiveron relación con Salvador e por iso tivemos que reducir o número de obras desta exposición-homenaxe e elixir a aqueles artistas vivos que tivesen unha relación máis estreita con el, que seguisen máis de preto a evolución da súa galería de arte e que en definitiva se identificasen coa forma en que el vía, sentía e admiraba a arte. En total son 39 obras doutros tantos autores que nos axudarán a entender mellor a súa ampla visión da creación artística contemporánea.

Os autores representados son: Carlos Albert, Juan Alcalde, Ali Ali, Darío A. Basso, Moncho Borrajo, Batís Campillo, Rafael Canogar, Luis Carré, Eva Carrera, Luis Caruncho, Javier Correa Corredoira, Manuel de las Casas, Alfonso Costa, Carlota Cuesta, Xaquín Chaves, Farreras, Yolanda Ferrer, Pepe Galán, Dolores Gálvez, Xulio García Rivas, Fidel Goás, Márgara Hernández, Loureiro, María Loureiro, Xoti de Luis, Jorge Llorca, José Luis Martínez, Din Matamoro, Vítor Mejuto, Manuel Moldes, Mariví Nebreda, María Joâo Oliveira, Xurxo Oro Claro, Francisco Pazos, Soledad Penalta, Paco Pestana, Manuel Ruibal, Blanca Silva, Miguel Zelada.

Xunto a eles, nove autores (Pepa Cerviño, Juan Ferrán Bello, Mª Rosa Gómez, Olga Patiño Nogueira, Ánxeles Penas, Paco Pestana, Mercedes Rozas, Xavier Seoane, Xulio Valcárcel) deixaron os seus textos nas paredes da sala, achegándonos a transcendencia de Salvador Corroto.