Oficina Municipal de Información ao Consumidor

Analizamos o material escolar

Duración: 1 h.

Idade recomendada: EPO e ESO.

Obxectivos:

• Coñecer as normas de seguridade e etiquetaxe que debe cumprir o material escolar que empregan.
• Saber elixir o material escolar axeitado.
• Ser capaces de analizar as características do material escolar.
• Aprender a mercar o material necesario e que realmente se vai utilizar.

Descrición:

Os participantes realizan un inventario ou lista co material escolar que empregan normalmente na clase e na súa casa, sinalando aquel que usan con máis frecuencia.

A continuación, por grupos analizarán diferentes aspectos de varios lotes de material escolar. Deberán comprobar que estes posúen unha etiquetaxe adecuada, comparar prezos, calidades e seguridade destes produtos. Todos estes datos anotaranse nunha ficha para finalmente sacar conclusións.

O vestido e as catro estacións

Duración: 1 h.

Idade: Educación Infantil e EPO.

Obxectivos:

• Ser conscientes de que o vestido serve para cubrir unha necesidade relacionada que impón a climatoloxía.
• Comprender que para cubrir esa necesidade non é preciso ter a casa chea de vestidos.
• Coñecer que hai distintos tipos de vestidos, dependendo da época do ano.

Descrición:

Os participantes contarán con varias siluetas de persoas que poderán vestir utilizando diferentes recortes de pezas. As ditas pezas son propias de diferentes épocas do ano, polo que deben clasificalas segundo a estación correspondente e finalmente vestir a súa silueta cos diferentes modelos.

Os participantes de Educación Primaria realizarán unha segunda parte da actividade consistente en identificar diferentes vestidos de varias culturas. Visualizando unhas tarxetas coa imaxe dunha persoa vestida conforme á súa cultura, deben emparellala con outra tarxeta na cal figure o nome do lugar de procedencia.

Construción de xoguetes

Duración: 1 h.

Idade recomendada: Educación Infantil.

Obxectivos:

• Tomar conciencia de que para xogar non hai que posuír necesariamente un xoguete.
• Ter unha actitude positiva cara á creación de xogos e xoguetes.
• Aprender a construír xogos e xoguetes a base de materiais de refugallo.
• Descubrir que fabricar xoguetes pode ser un xogo entretido, divertido e útil.

Descrición:

Durante este taller os participantes constrúen os seus propios xoguetes con material de refugallo. Algúns dos xoguetes que elaboran son:

•   Dominó do consumo responsable con cartón, revistas e catálogos de produtos.
•   Come-bólas cun bote de iogur, fío e un tapón de botella ou plastilina.

 Tamén aprenden novos xogos con materiais de refugallo, por exemplo o xogo das chapas.

Xogar sen xoguetes

Duración: 1 h.

Idade recomendada: Educación Infantil.

 Obxectivos:

• Tomar conciencia de que poden xogar sen xoguetes.
• Aprender xogos sinxelos para o desenvolvemento dos sentidos.
• Ser conscientes de que para divertirse non son necesarios os xoguetes.

Descrición:

Realízanse varios xogos non que non se empregan xoguetes para que sexan conscientes de que son igualmente divertidos. Algúns dos xogos realizados son:

•   Xogo de elefantes e palmeiras
•   Xogo das cadeiras
•   Xogo da laranxa e o limón
•   Xogo da compra imaxinaria
•   Xogo de pasar a palmada
•   Xogo do teléfono avariado
•   Xogo das ovellas e o lobo
•   Xogo do enredo