Oficina Municipal de Información ao Consumidor

Etiquetaxe e análise comparativa de alimentos

Duración: 1 h.

Idade recomendada: EPO.

Obxectivos:

• Habituarse a ler as etiquetas.
• Saber distinguir a primeira vista as partes máis importantes dunha etiqueta.
• Coñecer o significado dos termos das etiquetas.

Descrición:

Empréganse etiquetas de produtos reais para comprobar se aparece toda a información que debería. Os participantes deseñan o seu propio “produto” e deberán etiquetalo correctamente.

Os aditivos

Duración: 1 h.

Idade recomendada: ESO e Bacharelato.

Obxectivos:

• Coñecer a existencia dos aditivos, a súa variedade, utilización e significado dentro dos alimentos.
• Recoñecer nas etiquetas dos produtos alimentarios envasados os distintos aditivos que se empregaron, a proporción en que se encontran dentro do produto etc.
• Valorar de forma axustada a conveniencia dos alimentos con menos aditivos, que integren unha dieta equilibrada.

Descrición:

Mediante distintos xogos, os participantes aprenden o que son os aditivos e como recoñecelos entre os ingredientes que figuran na etiqueta dun produto.

Froitas e verduras

Duración: 1 h.

Idade recomendada: Educación Infantil.

Obxectivos:

• Entender a importancia das froitas e verduras na alimentación diaria.
• Que os participantes sexan capaces de analizar se a súa dieta é equilibrada con respecto ao consumo de froitas e verduras.
• Coñecer os produtos ecolóxicos e formar unha opinión obxectiva destes mediante a realización dunha análise comparativa.

Descrición:

A importancia de incluír froitas e verduras na nosa dieta diaria tratarase a modo de xogo nesta actividade.

Fanse varios “experimentos” tanto de descubrir sabores, cheiros e cores nas froitas e verduras como para pescudar se as cantidades que toman os participantes están dentro das cantidades saudables.

Erros na alimentación

Duración: 1 h.

Idade recomendada: ESO e Bacharelato.

Obxectivos:

• Analizar as características do almorzo habitual ao longo da semana, nas fins de semana e nas vacacións.
• Ser capaces de avaliar as calidades nutritivas de cada tipo de almorzo, que normalmente realizan.
• Identificar os diferentes tipos de almorzo e saber cales son máis axeitados para cada tipo de actividade (esforzo físico grande, traballo intelectual, vida sedentaria etc.).

Descrición:

Analizamos varios aspectos da alimentación diaria: horarios, alimentos inxeridos, cantidades  nutricionais recomendadas… e intentamos descubrir os erros máis habituais que se producen (carencias, malos hábitos, horarios inadecuados…).

Natural e artificial

Duración: 1 h.

Idade recomendada: Educación Infantil e EPO.

Obxectivos:

• Analizar as vantaxes dos produtos naturais fronte aos artificiais.
• Conseguir que os alumnos e as alumnas tomen contacto cos zumes naturais como alternativa ao consumo de refrescos industriais e fonte de vitaminas para o organismo.
• Capacitar o alumnado para que poida elaborar zumes por medios sinxelos.

Descrición:

Este taller componse de diferentes experiencias:

• Proba de zumes e froitas (xogo).
• Condimentar diferentes alimentos e comprobar as diferenzas.
• Elaboramos o noso almorzo “natural”.