A cuarta cita do Circuíto de Carreiras Populares Coruña Corre corresponde á Baixada Popular de Cros San Pedro de Visma, a cal ten o mérito de ser a máis lonxeva das probas incluídas no calendario. O traballo conxunto entre Asociación de Veciños Loureiro de Visma, Club Riazor Coruña e Concello deron a luz os percorridos correspondentes a cada unha das categorías, os cales presentan algunha novidade con respecto a edicións anteriores, especialmente nas categorías de menores, onde se equipararon as distancias co resto de carreiras do circuíto.

Na proba absoluta a distancia para percorrer será aproximadamente 6.490 metros. A saída producirase ás 10.30 horas á altura do centro cívico, dende o corazón do barrio, para dende alí iniciar a subida sempre en dirección ao Parque de Bens. Unha vez no interior do parque prodúcese o cambio de asfalto a terra, outra das particularidades deste circuíto. Tras percorrer aproximadamente tres quilómetros e medio polos seus sendeiros iníciase a verdadeira Baixada con case dous Km. descendentes ata a meta.

En canto á categoría cadete e xuvenil, cuxa saída está prevista cinco minutos máis tarde cá absoluta, partirán dende o mesmo punto e percorrerán 2.300 metros, nun tramo de ida e volta que os levará ata o aparcadoiro do Parque de Bens.

Ás 11.40 horas será a quenda da categoría infantil debendo realizar dúas voltas a un circuíto de 800 metros. Alevíns e benxamíns a continuación só necesitarán dar unha volta sendo as súas saídas ás 11.55 e 12.10 horas.

Concluirán as carreiras coa saída dos pitufos ás 12.25 horas, os cales deberán percorrer unha recta de 150 metros dentro do propio barrio. Nesta categoría, como adoita ser habitual, efectuaranse tantas saídas como sexan necesarias segundo o número de participantes.