Son varias as citas para correr que temos no horizonte, e adaptadas para todos os niveis e todos os gustos. Os 6.515 metros da Popular da Torre do 29 de marzo representan un desafío alcanzable. Esta proba, integrada no Circuíto Coruña Corre reúne nestes momentos a case 3200 participantes, cifra que aínda pode aumentar ata o remate de inscricións o vindeiro martes 25 ás 23.30 horas. O seguinte encontro co running na cidade, ordenados por data e criterio de dificultade, localizámolo o 27 de abril, xa que todos e todas as que queirades vivir o ambiente do Maratón Coruña42 poderédelo facer coa súa carreira 10K paralela. Por suposto ese mesmo día será o sinalado para o gran reto que é correr o 42,195 Km. dun Maratón Atlántica, único homologado en Galicia e referencia no noroeste peninsular.

Todas as propostas teñen algo en común, as necesarias horas de dedicación ao adestramento, e para iso queremos axudarvos. Despois da boa acollida da primeira clase maxistral impartida por Andrés Díaz e Yolanda Gutiérrez, o Concello, a través da Concellería de Deportes, e El Corte Inglés, propoñémosvos unha nova oportunidade. O vindeiro sábado 22 de marzo teremos a segunda sesión mestra dirixida por Paula Mayobre e Andrés Díaz. Ao palmarés de todo un recordman de Europa como Andrés, unimos esta vez a outra das atletas de referencia no panorama galego e nacional coa presenza de Paula. A corredora natural de Ares viu cumprido un soño recentemente coa creación da Escola Deportiva de Atletismo Paula Mayobre, co que demostra a súa ilusión polo atletismo e por compartir os seus coñecementos.

Ambos dirixirán un adestramento matinal (11.00 horas) na Praza da Cubela (detrás de El Corte Inglés), aberto a todos os atletas populares que desexen mellorar e aprender con dous dos mellores corredores galegos nun ambiente lúdico. Todos os que desexen participar deberán enviar un correo electrónico ao seguinte enderezo: carreraspopulares@coruna.es . A actividade é gratuíta e todas as persoas participantes recibirán como obsequio unha camiseta.

Unha oportunidade inigualable de participar nun adestramento con grandes atletas galegos, e gozar da unión de corredores amateurs con outros de primeira liña nun calendario que se repetirá na preparación de cada unha das nosas grandes carreiras.