Urbana-CProxecto integral de rexeneración urbana da Agra do Orzán, A Coruña

As cuestións abertas no barrio afectan a moitos ámbitos temáticos que teñen unha forte interrelación.

A mobilidade, por exemplo, require unha reordenación integral do actual modelo de tráfico rodado. Pero tamén fai necesario reducir a dependencia dos vehículos, para o que é preciso traballar no deseño de espazos dotacionais accesibles. Promover a cultura da proximidade require intervir na mellora do espazo público e no seu deseño pensado exclusivamente para o tráfico rodado. Así mesmo, hai que promover que a actividade comercial tradicional responda ás demandas dos veciños e poida competir con outros tipos de plataformas comerciais.

Os demais factores sobre os que é necesario intervir tamén presentan unha densa trama de interrelacións que esixe que as actuacións de desenvolvemento do entramado urbano da Agra do Orzán se contemplen dende unha perspectiva integrada. Esta perspectiva integrada require considerar de forma conxunta os aspectos económicos, ambientais e sociais para deseñar unha intervención que sitúe a Agra nun horizonte de crecemento e de sustentabilidade.

En primeiro lugar, considerouse imprescindible acometer unha actuación de gran calado que incida tanto en aspectos formais como funcionais da paisaxe urbana. Esta actuación catalizadora e con efecto sinérxico é a construción do equipamento denominado “Ágora”.

Ademais, no modelo de urbanización da Agra do Orzan é posible gañar espazo público e mellorar a calidade do hábitat, pero non o é a creación de zonas verdes ou equipamentos. Para solucionar esta cuestión, que se considerou fundamental para a sustentabilidade ambiental e social do barrio, é necesario orientar a nova urbanización de parcelas próximas ao espazo residencial dándolle unha especial importancia á creación de parques públicos. Neste sentido, a remodelación da ampla parcela do Observatorio Meteorolóxico, a contorna dos bloques residenciais de Mariñeiros e a propia contorna do Ágora están orientados a cumprir este obxectivo de mellorar os estándares de espazos dotacionais e zonas verdes.

Baseándose nestas reflexións, a estratexia de intervención do proxecto descansa nos seguintes tres puntos:

• Un proxecto sinérxico que contribúa á eficacia das actuacións de desenvolvemento da sustentabilidade urbana.
• Unha actuación integrada que incida nos factores económicos, ambientais e sociais clave.
• Unha mellora dotacional mediante un desenvolvemento urbanístico da contorna do barrio centrado na construción de equipamentos e zonas verdes.

As intervencións que dende unha perspectiva integrada se van levar a cabo permitirán acadar os seguintes obxectivos:

1. Potenciar a imaxe do barrio mediante a construción dun equipamento público de calidade arquitectónica e con dotacións que permitan revitalizar a súa vida social e cultural.
2. Incrementar os servizos e dotacións do barrio, en especial os de atención a maiores, á infancia e a políticas de igualdade de oportunidades.
3. Reducir as necesidades de mobilidade e mellorar a accesibilidade mediante a ordenación integral do tráfico rodado, a mellora do espazo público, iniciativas de peonalización e a promoción da cultura da proximidade.
4. Mellorar a calidade do espazo público urbano, en especial na zona central do ámbito do proxecto e en zonas como Mariñeiros ou as vivendas sociais.
5. Promover a incorporación da muller ao mercado laboral mediante políticas de apoio específicas e creando servizos accesibles de coidado dos menores.
6. Mellorar o comercio mediante intervencións de apoio a comerciantes en materia de xestión e merchandising e adaptación dos seus negocios ás novas tecnoloxías.
7. Desenvolvemento de sectores de actividade específicos, como a hostalería.
8. Promover a creación de empresas de nova xeración mediante o desenvolvemento dun centro de negocios e incubadora de empresas vinculadas á sociedade do coñecemento e as novas tecnoloxías.
9. Aumentar considerablemente a superficie de parques públicos e zonas verdes mediante a urbanización de zonas lindeiras co barrio.
10. Promover a integración da poboación inmigrante e a súa participación na economía e a vida social do barrio mediante actuacións específicas de apoio e asesoramento.
11. Promover a implicación da veciñanza e a difusión das actuacións de desenvolvemento urbano do proxecto mediante unha programación cultural específica.
12. Desenvolver estas actuacións mediante un modelo de xestión eficiente, transparente e participativo.