A concelleira de Xustiza Social e Coidados, Silvia Cameán, convocou ás traballadoras sociais do Concello da Coruña a unha reunión o próximo día 9 de setembro que servirá para analizar o borrador da futura Renda Social Municipal. “Con este encontro queremos coñecer a opinión e as achegas das persoas que logo van ter que traballar con esta ferramenta de forma efectiva”, explica a edila.

“A Renda Social Municipal é unha das nosas principais medidas e compromisos electorais, por iso dende o primeiro momento comezamos a traballar para poder facela posible”, explica Cameán, quen adianta que, neste momento, “atópase xa moi avanzada”.

Non obstante, a intención da concelleira de Xustiza Social é coñecer a opinión daqueles empregados e empregadas municipais que logo traballarán de forma efectiva coa Renda Social Municipal. “Consideramos que as traballadoras sociais teñen moito que dicir e aportar a esta nova ordenanza, xa que son as que día a día tratan coas diversas problemáticas ás que trata de atender esta renda, e son, polo tanto, as primeiras coñecedoras das necesidades actuais e dos aspectos máis prácticos”, indica a concelleira do ramo. “Na reunión que convocamos escoitaremos as súas  propostas e profundizaremos na análise conxunta e colaborativa, xa que cremos na lóxica de construír de abaixo cara arriba”, dixo.

A concelleira Cameán insistiu no seu desexo de que “todas as persoas se sintan partícipes dos cambios e colaboren na configuración dunha ferramenta que mellorará enormemente a calidade de vida da cidadanía”. “Queremos avanzar cara a xustiza social e, por suposto, acompañados de toda a xente imprescindible neste camiño”, resumiu.