|
A construción da Coruña sustentouse durante os últimos anos sobre
piares fundamentais como son os servizos sociais, a educación e
a cultura, cos que se persegue, como principal obxectivo, o benestar
dos cidadáns e o desenvolvemento dunha sociedade aberta,
tolerante e solidaria, valores polos que se caracteriza a cidade.
É por iso que dende sempre o Concello realizou unha forte
aposta para ofrecer os mellores servizos de apoio, atención e promoción
sen descoidar nin a nenos nin a maiores.
Así, teceuse, ano tras ano, unha rede na que destacan, por encima
das infraestruturas, as persoas, o que fixo da Coruña un referente
e exemplo que teñen que seguir outras cidades. A universalización
dos servizos, sen descoidar a ninguén, permitiu cubrir as
demandas de todos os coruñeses, á marxe das competencias
administrativas e sen lle poñer freo a unha política na que
se buscou, por encima de todo, darlles resposta ás necesidades
xurdidas a diario, pero tamén ás futuras e propias dunha
sociedade que evoluciona, que medra e que se adapta ás esixencias
dos novos tempos.
Co desexo de non coartar as posibilidades dos coruñeses, sobre
todo dos máis pequenos, traballouse con intensidade e imaxinación
para satisfacer as ilusións dos nenos, porque son eles os
cidadáns do mañá, os que definirán o papel da Coruña
como cidade e dentro dun escenario mundial que vive en pleno proceso
de globalización. Por iso, por ofrecer as mellores oportunidades,
as mesmas das que gozan os habitantes de grandes urbes, dende o
Concello realizouse un labor incansable que non deixa de dar os
seus froitos.
Mostra deste labor é a memoria que agora se presenta e que
evidencia os bos resultados obtidos do traballo que entre todos
se vén desenvolvendo, sempre coa colaboración inestimable
dos mesmos cidadáns que gozan dos servizos que o seu Concello
lles oferta dende o punto de vista social, cultural e educativo.
Francisco Vázquez Vázquez.
Alcalde da Coruña.
|
