A principios do século XXI, a cidade da Coruña
quere ser unha cidade moderna, plural e acolledora. A vida urbana,
cada vez máis dinámica e aberta, require cambios culturais
profundos que serán o principal motor de transformación
dunha sociedade diversa e aberta a múltiples influencias: a
mundialización económica, os movementos sociais, as
tecnoloxías da información e da comunicación
e a desigualdade de acceso que provocan, a configuración do
Estado, o noso propio patrimonio e a nosa tradición; todos
eles, xunto con outros, son elementos que inciden na cidade e nas
súas manifestacións culturais.
Coido que todos estaremos de acordo en que a cultura
que queremos para a nosa cidade admite os grandes eventos que as
institucións poden promover, pero tamén actos culturais
que xorden en diversos puntos da Coruña ou as innovacións
artísticas dos creadores que van acadando un recoñecemento.
Debemos acoller e facer nosas estas manifestacións cidadás
como mostra da riqueza e pluralidade da nosa sociedade.
A oferta cultural e educativa requiriron a posta en marcha
de múltiples programas e proxectos que teñen en común
o desexo de modernización e participación social,
posto que a acción municipal intentou que os coruñeses,
especialmente nenos e mozos, sexan os auténticos protagonistas
dunha programación cuns resultados que se presentan agora
co desexo de responder ás demandas que cada vez con maior
intensidade trasladan os coruñeses.
Confío en que fosemos quen de responder a estas
expectativas e para isto o Concello seguirá buscando alternativas
e proxectos que saiban satisfacer as necesidades culturais e educativas
da cidade, desde ámbitos tan diversos como a música,
o teatro, as exposicións, a educación, e outros moitos.
|
.gif){kind=small}
