 Filosofía europea
No contexto europeo de xestión e tratamento dos residuos destaca a aprobación
en 1973 por parte do Consello Europeo do Primeiro Programa de Acción en
Materia de Medio Ambiente. Nel plásmanse os principios e os obxectivos
dunha política comunitaria ambiental que diminúa os efectos de problemas
como a contaminación atmosférica e os vertidos no medio. Despois
doutros importantes documentos intermedios, en 1993 publicouse o V Programa
de Política e Actuación en Materia de Medio Ambiente e Desenvolvemento
Sostible, co subtítulo de "Cara a un desenvolvemento
sostible". Ademais dunha continuación dos anteriores programas,
recolle as propostas e recomendacións encadradas na Axenda
21 e na "Cumbre de la Tierra de 1992".
A partir deste programa desenvolveuse en 1994 a Directiva CEE de envases
e residuos de envases. Previamente xa existían outras normativas
europeas, e era a última ata ese momento a Directiva 91/156/CEE na que
se fai un especial fincapé no xeito de afrontar os residuos, cunha orde
de prioridades que son a prevención ou redución da produción,
a recuperación de fraccións como materias primas secundarias e
o fomento da utilización dos residuos como fonte de enerxía.
A nivel da CE, só no período de entre 1975 e 1990, produciuse
un incremento do 20 % na produción de residuos, mentres que a taxa de
produción por habitante e ano aumentou en case un 15 % (Fonte: V Programa).
Na xestión e no tratamento dos residuos cada país é diferente,
dependendo de factores como a renda por habitante e o estado de implantación
dos programas en función da súa data de inicio. Aínda que
é difícil xeneralizar, nun extremo atópase Luxemburgo,
que aposta decididamente pola incineración (75 %).
No extremo contrario sitúanse Finlandia, Portugal e Grecia, que teñen
como sistema preferido o vertido (por riba do 80 %). Suíza e Dinamarca
están á cabeza da reciclaxe, con taxas de arredor
do 20 %. España e Austria son os países que meirande proporción
de residuos envían á compostaxe, arredor dun
15 %. En calquera caso as taxas de reciclaxe son aínda baixas e o vertido
e a incineración son os sistemas imperantes. Todos os países pertencentes
á CE deberán facer un grande esforzo nos próximos anos
para acadar as metas previstas.
 Residuos e solos
|
