Uso de cookies nas páxinas web do Concello de A Coruña

Nas páxinas web municipais utilizamos cookies propias e de terceiros para mellorar os nosos servizos mediante o análise dos seus hábitos de navegación. Se continúa navegando, consideramos que acepta o seu uso. Pode obter máis información, ou coñecer como cambiar a configuración, na nosa páxina de "Normas de uso"..

Igualdade e diversidade

18 de novembro de 2016

O Concello pon en marcha a campaña 'A Coruña en negro contra as violencias machistas' con máis de 200 entidades da cidade "para mostrar a implicación común de todos os axentes contra esta realidade"

Rocío Fraga presentou 'A Coruña en Negro'

A edil de Igualdade, Rocío Fraga, presentou a iniciativa, que se desenvolverá desde hoxe e ata o próximo 28 de novembro en 17 concellos de Galicia. Na Coruña participarán axentes do ámbito deportivo, hostalería e comercial, así como os distintos servizos e recintos municipais

A concelleira de Igualdade e Diversidade, Rocío Fraga, presentou esta mañá no Pazo de María Pita as actividades vinculadas ao 25 de novembro, o Día contra as Violencias Machistas, e que este ano enmárcanse na campaña A Coruña en negro contra as violencias machistas, unha iniciativa que se desenvolverá desde hoxe e até o próximo luns 28 en 17 concellos de Galicia, que onte se adheriron no Pazo de Raxoi á proposta. "O obxectivo destes 'Concellos en Negro' é concienciar á veciñanza e expandir visiblemente unha imaxe asumible por todas e todos os axentes sociais, e que mostre a implicación común, como non pode ser doutro xeito, en repulsa das violencias machistas", expuxo Fraga. "As efemérides son importantes para visibilizar realidades. Estas campañas axudan a que as mulleres que acoden ao CIM ou á Rede de Acollida o fagan cunha actitude moito máis normalizada e non de vergoña, o que supón unha barreira menos tamén para afrontar a súa situación", explicou Fraga.

A campaña que hoxe comeza ten como obxectivo sensibilizar á cidadanía "a través da implicación, nun primeiro momento, do comercio de proximidade, que tingue a súa imaxe máis coñecida, os seus escaparates, de negro", explicou a responsable municipal, quen indicou que "na Coruña iremos máis aló e traballaremos con axentes e entidades locais doutros sectores, como do ámbito deportivo ou da hostalería, á fin de chegar a toda a veciñanza".

Na presentación desta mañá, a concelleira avanzou a adhesión de 217 entidades locais á campaña, "ás que se lle facilitará material editado polo Concello para mostrar o seu compromiso", entre as que se atopan 33 clubs deportivos, como o Real Club Deportivo da Coruña; 140 comercios e asociacións comerciais, incluíndo o Centro Comercial Catro Camiños, e 44 locais de hostalería, ademais de 90 servizos e centros municipais, como son os nove mercados, bibliotecas, centros cívicos, CMIX e espazos como o Fórum Metropolitano, centro Ágora, entre outros. "Todas aquelas entidades que desexen adherirse estes días á campaña, e vestirse de negro en contra da violencia, tamén poderán facelo", afirmou Fraga, quen avanzou que a acción tamén chegará ás redes sociais cos cancelos #CoruñaEnNegro e #EnNegroContraAViolencia. "Esta proposta 'piloto' é aberta, e agardamos que esta implicación e compromiso medre co tempo", dixo a edil, que estivo acompañada na rolda de prensa por Iria Rodríguez, responsable de Relacións Públicas de Gadisa, e de José Ignacio Prada, Director da Compañía de Tranvías.

Ademais desta proposta visual, a programación da campaña inclúe actividades en centros cívicos así como nos centros educativos a través de representacións teatral coa obra Vestido de voda.

"Alén destas accións, hai un traballo de visualización necesario que debe facerse no día a día. Este ano levamos 38 asasinatos machistas como cifra oficial, pero para nós son 92 feminicidios e asasinatos, se contamos outros casos tamén vinculados a estas violencias", advertiu a edil. Neste sentido, Fraga vinculou o lanzamento de A Coruña en negro contra as violencias machistas con outras iniciativas que se están a desenvolver desde a súa área, como o lanzamento do 'Pacto por unha cidade libre de violencias machistas'. "Onte mantivemos a primeira xuntanza con entidades sociais arredor deste proxecto no Centro Cívico Monte Alto", explicou, "co espírito de vincular a todos os axentes da cidade na loita contra as violencias machistas". A edil sinalou que este proceso terá unha primeira fase, entre os meses de novembro e maio, que permitirá "elaborar medidas e compromisos tanto para as administracións públicas como para as entidades sociais".

  • Concello da Coruña
    • Ayuntamiento de A Coruña | Concello da Coruña
    • Praza de María Pita, 1. 15001 A Coruña
    • 981 184 200 | 010
Tes un navegador demasiado antigo!

Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Safari e Microsoft Internet Explorer 10 ou superior. Instalar agora un navegador compatible

?