O aire que nos rodea

A atmosfera, extraordinariamente complexa, é imprescindible para a vida na Terra. O ser humano, coas súas actividades, altera e modifica o ritmo da atmosfera ata o punto de que, en moitos dos casos, a consecuencia é unha elevada contaminación, e isto ten unha gran repercusión nos seres vivos.

Pero cando falamos de “contaminación atmosférica”, que significa?. O primeiro no que todos pensamos é na “contaminación do aire”, é dicir, cambios na composición química da atmosfera debidos á existencia de gases e de compostos nocivos para a nosa saúde, aparición de chuvia aceda, destrución da capa de ozono, efecto invernadoiro, etc. Pero tamén o ruído é un dos axentes contaminantes máis importantes, tamén existe unha “contaminación acústica”.

A maioría da poboación considera que o factor máis importante para gozar dunha axeitada calidade de vida na cidade e dun medio ambiente saudable é que o aire que respiramos estea en óptimas condicións. Para conseguir niveis “aceptables” de contaminación temos que levar a cabo unha rigorosa vixilancia da polución do aire e un control da contaminación acústica. Pero o máis importante é previr, é dicir, desenvolver as nosas actividades cotiás sen contaminar, e vivir de maneira responsable nun medio que, en definitiva, é de todos.