Plan de xestión de residuos e o papel fundamental que nel xoga a cidadanía

Mailing cidadán: O 100% dos fogares coruñeses recibiron puntual información acerca do Plan de Residuos e da inauguración do Parque de Bens. 

Exposicións itinerantes:
A Coruña, cidade sostible: 15 paneis que explican o Plan de Xestión de Residuos da Coruña e o proceso do selado e da recuperación ecolóxica do antigo vertedoiro de Bens e dos seus arredores.
As pilas: 4 paneis que presentan a problemática da utilización das pilas e da súa xestión como residuo, e informan o cidadán da situación das empresas e entidades coruñesas que colaboran co Concello na recollida de pilas usadas.

Campañas escolares:
Nas últimas décadas, paralelamente ao aumento do nivel de vida, á prosperidade económica e ao progresivo distanciamento do contorno medioambiental, os hábitos de consumo da maioría da poboación evolucionaron cara á ignorancia da súa repercusión sobre ese contorno. Isto desencadeou gravísimos problemas ambientais. Un dos maiores retos actuais é atopar unha solución á acumulación e eliminación dos residuos resultantes do principio de "usar e tirar", imperante hoxe en día.

O tratamento dos residuos urbanos (RSU) é competencia directa das administracións locais, que teñen que buscar alternativas á saturación dos vertedoiros, aos problemas de saúde pública que estes ocasionan, ou á mala imaxe que causan entre a poboación. O Concello da Coruña foi aínda máis lonxe: elixiu o sistema de tratamento e eliminación máis responsable de cantos actualmente se coñecen. Xa non se trata só de solucionar un grave problema. O esforzo vai ademais dirixido a fomentar entre a cidadanía unha nova cultura ambientalmente responsable, a única posible ante os actuais retos ecolóxicos que ten que afrontar a nosa sociedade e o planeta no seu conxunto.

No actual Plan de Tratamento de Residuos Urbanos da Coruña apóstase por unha separación selectiva en orixe (recollida selectiva), que permite unha mellor integración dos residuos en procesos de reciclaxe, compostaxe, eliminación, etc. Esta alternativa fundaméntase nunha ampla e activa participación cidadá. Os veciños da cidade deben estar constantemente informados tanto do sistema que se escolle para a eliminación de residuos como das vantaxes que este supón. É dicir, da importancia do seu papel persoal e colectivo neste esforzo común. Neste sentido, a formación e a información da comunidade escolar é un paso fundamental.

A primeira campaña escolar correspondente ao Plan de Residuos chegou ao 100% dos escolares de entre 3 e 6 anos. Xa está en marcha a segunda campaña.