Principios metodolóxicos

A educación ambiental, dende o punto de vista metodolóxico, proponse a necesidade de desenvolverse a través de procedementos que sexan coherentes coas súas bases éticas e conceptuais. Por iso, parte do suxeito que aprende para construír o coñecemento, concibindo a aprendizaxe como un proceso, no que o intelectual e o afectivo están estreitamente vinculados, educando en termos de relación, interacción e interdependencia, partindo do próximo para chegar a un pensamento global.

A educación ambiental como unha educación en valores que debe desenvolver estratexias de modificación de conduta: os dilemas morais, a clarificación de valores a través dos xogos de simulación ou as dramatizacións, os exercicios de roles, as vivencias persoais, a investigación… son as ferramentas coas que contarán estes proxectos educativos.

A elección dos temas ou centros de interese deben estar localizados no contorno próximo. Así, hai que optar por cuestións locais, que lle afecten directamente á vida dos cidadáns ou da súa comunidade, sen perder a perspectiva global; esta concepción recóllese perfectamente no Informe Brundland: pensar globalmente, actuar localmente.

O medio ambiente é o resultado da interacción no tempo e no espazo de factores biolóxicos, físicos, económicos, sociais e políticos, polo que a súa comprensión require o estudo dos seus elementos e interaccións entre eles.