Itinerario · Xardíns de Méndez Núñez

O noso seguinte obxectivo son os xardíns de Méndez Núñez. Situados en pleno centro da cidade, e creados nunha zona gañada ao mar, contan con numerosas árbores ornamentais e entre as súas pólas é posible atopar carboeiros ou ferreiriños comúns e garrapinos, mosquiteiro ibérico ou picafollas, papuxa das amoras, rula turca, pomba torcaz ou pombo, merlo, pardal ou estorniños pintos. Este último, no inverno, forma ao anoitecer inmensas bandadas que acoden a durmir a este e a outros parques da cidade, de onde parten de novo coas primeiras luces da mañá. É entón cando é posible observar as accións de caza do falcón peregrino. Outros xardíns do centro, como os de Santa Margarida, albergan unha avifauna similar.