Un pouco de historia

A mediados do século XIX o abastecemento de auga á cidade da Coruña facíase mediante o aproveitamento de diversos mananciais dos seus arredores: Santa María de Oza, San Pedro, Brazal, Frile e Vioño. Cara a 1860, engadíronselles os de Gramela, Conchiñas, Nelle, Vioño e Torre das Vellas. O seu caudal era conducido por dous grandes ramais denominados San Pedro e Vioño, acompañados polas fontes de Santa Catalina, San Andrés e Santa Lucía, da praza do Correo Vello, da Franja e do Deseo.

Ante o aumento do número de habitantes e o cada vez meirande desenvolvemento da industria, fíxose imprescindible dispoñer dunha traída de augas a grande escala que facilitase a cantidade necesaria para cubrir as necesidades presentes e futuras. Deste xeito, unha vez adxudicado por concurso, o enxeñeiro Juan Fernández Yáñez elabora en 1881 o proxecto das obras de abastecemento de augas da Coruña, tomándoas do río Barcés. Por Real Orde do 1 de maio de 1885 concédenselle ao Concello da Coruña 100 litros de auga por segundo do río Barcés con este fin.

En 1890 os empresarios Ernest John Bayliss e Roberto Baldelló presentan unha proposición para realizar a explotación do servizo de augas que é aceptada polo Concello en decembro dese ano. Ao ano seguinte transfiren os seus dereitos á sociedade inglesa "The Britsh and Foreign Trading Company Limited", e asínase o 20 de xuño de 1892 a escritura de contrato entre a devandita empresa e o Concello. En 1894 traspasa a concesión da traída de augas á firma inglesa "The Corunna Waterworks Company Limited". Tras varios incumprimentos, o 30 de agosto de 1899, o Concello acorda a rescisión do contrato e caducada a concesión. Finalmente, co apoio favorable do Concello, pola Real Orde do 13 de xuño de 1903, declárase a caducidade da concesión de auga do río Barcés, que é ratificada en 1908.

 Ciclo da auga