 Recuperación de Bens
A Coruña é un gran balcón sobre o mar. Pero durante case
vinte anos unha das súas fachadas tivo unha función escura. Dende
comezos da década dos 80 as ladeiras do Monte
de Bens foron o depósito de residuos tanto da propia cidade como
de municipios veciños: un vertedoiro.
A acumulación do lixo chegou ao seu límite cando o 10 de setembro
de 1996 se produciu o seu derrubamento. Os residuos espalláronse en dirección
ao pequeno porto do
Portiño . A nova tivo eco a nivel internacional e o tratamento
dos residuos urbanos volveu ao primeiro plano das novas. Inmediatamente comezaron
os traballos para evitar que se estendese a contaminación mediante a
instalación de barreiras e os labores de desentullar e volver asentar
as 100.000 toneladas de residuos que se desprazaron.
A partir dese momento, a xestión do tratamento dos residuos da nosa
cidade cambiou radicalmente. O accidente de Bens estimulou unha seria e intensa
reflexión que deu lugar a unha nova filosofía e a unha forma totalmente
diferente de abordar o problema, moderna e comprometida coa conservación
do contorno. A clave do futuro é, dende ese instante, a sostenibilidade.
E así comeza a xestarse o actual Plan
de Tratamento de Residuos da Coruña .
De inmediato, e paralelamente, púxose en marcha o proxecto do selado
e da rexeneración do vertedoiro e da recuperación do seu contorno,
de forma que tivese lugar a súa transformación nun gran parque
de arredor da cidade para o goce dos coruñeses e dos seus visitantes.
Este parque inaugúrase o 5 de xuño do 2001, coincidindo co Día
Mundial do Medio Ambiente.
 Recuperación de Bens
|
