Orgánico · Inorgánico

Un Plan de Residuos como o do Concello da Coruña baséase na colaboración cidadá. O primeiro e máis importante paso realízase en cada un dos fogares. Desta forma cada un de nós convértese nun xestor a partir do que se desenvolve todo o plan.

A primeira selección realízase no caldeiro ecolóxico ("ecocubo"). Durante a primeira fase do plan, o Concello repartiu máis de 90.000 caldeiros, un por cada núcleo familiar co obxectivo de facilitar a separación.

O caldeiro ecolóxico dispón de dous compartimentos separados, cada un destínase a un tipo de residuos. Por que esta separación? Case a metade dos nosos lixos domésticos, o 44 % en peso, é materia orgánica. De aí a importancia de dispoñer dunha bolsa específica para ela.

Isto é materia orgánica: restos de alimentos como pan, froita, verduras, espiñas de peixe, ósos, cascas de ovo, etc. Tamén cueiros usados ou alimentos caducados, pero sen os envases.

O resto do lixo deberase depositar no segundo compartimento do caldeiro, o da materia inorgánica. Por exemplo: latas, tetra bricks, envases de plástico, etc.

Lembra que para o papel e para o vidro existen colectores diferentes e tamén se deben separar.

Aínda que o caldeiro ecolóxico é unha ferramenta moi útil e axúdanos neste labor, non é imprescindible e calquera bolsa, mellor se é reciclable, serve para o mesmo propósito.

Estas bolsas deposítanse posteriormente nos colectores das rúas. Os dous colectores aparecen xuntos. O verde, máis pequeno, é para a materia orgánica. Aínda que a súa proporción en peso é maior, o seu volume é menor. Está identificado coa lenda "Deposita aquí só os teus restos de alimentos". É importante que a selección sexa axeitada, xa que diso dependerá a calidade do compost final.

O colector grande, semellante ao habitual, é para os residuos inorgánicos. Distinguiralo pola tapa de cor amarela.