Axenda 21

A Axenda 21 é un programa para desenvolver a sostenibilidade a nivel planetario, aprobado por 173 gobernos na Conferencia das Nacións Unidas sobre Medio Ambiente e Desenvolvemento que se levou a cabo en Río de Janeiro en 1992. Abarca aspectos económicos, sociais e culturais, así como relativos á protección do medio ambiente. O seu capítulo 28 anima as comunidades locais a crear a súa propia versión, unha  Axenda 21 Local. 

O certo é que gran parte dos obxectivos da Axenda 21 dependen case en exclusiva do papel das comunidades locais. É dicir, das decisións, actitudes e comportamentos da cidadanía e das autoridades locais. Estas últimas ocúpanse da creación, do funcionamento e do mantemento da infraestrutura económica, social e ecolóxica, supervisan os procesos de planificación, establecen as políticas e regulamentacións ecolóxicas locais e contribúen á execución das políticas ambientais nos planos nacional e internacional. Grazas á súa proximidade á cidadanía, desempeñan unha función importantísima na educación e na mobilización da cidadanía a favor do desenvolvemento sostible.