A cidade da Coruña dispón de institucións públicas e privadas que cobren todas as necesidades dos seus cidadáns no eido educativo; dende unha importante rede de centros de educación infantil, centros de educación primaria e secundaria ata a presenza na cidade da Universidade da Coruña.
O Concello colabora na tarefa educativa a través do Servizo Municipal de Educación, que organiza actividades educativas que teñen como obxectivo complementar a educación académica dos alumnos coruñeses, ofrecendo oportunidades de formación en aspectos culturais menos desenvoltos nos currículos dos distintos niveis educativos. Estas actividades teñen, pois, un carácter complementario, aínda que se pretende que os consellos escolares dos centros que participan nelas as inclúan nos seus plans anuais de centro e no seu proxecto educativo, para que queden incorporadas de maneira estable ao desenvolvemento da súa actividade pedagóxica.
Aínda que as competencias e responsabilidades municipais se reducen ao mantemento dos centros públicos de Educación Infantil e Primaria, a Corporación Municipal da Coruña estableceu unha política de intervención na mellora da calidade dos equipamentos que a leva a realizar distintas obras de investimento para mellorar espazos exteriores e dotar de infraestruturas e equipamentos deportivos os colexios públicos da cidade. O obxectivo deste proxecto é incrementar a calidade da educación pública e proporcionarlles instalacións deportivas aos núcleos de poboación do contorno dos centros para que poidan ser utilizados nos horarios non escolares.
MÁIS INFORMACIÓN:
Servizo
Municipal de Educación
Consello Escolar Municipal
Oferta Educativa Municipal
Intranet Educativa
Programa educativo: "Aprender en Coruña 2006/07"
